الجمعة، 9 مايو، 2008

حينما سقطت طائرة عسكرية على قرية والدي

اليوم سأقص قصة عرفتها بالصدفة منذ عدة أيام من والدي ووالدتي عن حرب أكتوبر وتفاصيلها كالتالي :
أولاً : والدي ووالدتي أصلهما يعود لبلد ريفية في مدينة الرياض بمحافظة كفرالشيخ وكان والدي في وقت المعركة فبالفرقة الأولى بكلية الطب ووالدتي كانت بالصف الثالث الإعدادي وكانت في إجازة لأن المدارس في كفرالشيخ كلها كانت فى إجازة حيث كان موسم جني القطن في المحافظة وكان من سلطة المحافظ وقتها أن يؤجل الدراسة أسبوع لأن المحافظة بطابعها زراعية .... 

بالطبع المحافظة تغيرت كثيراً عن الأول
المهم
قالت أمي " كنت جالسة في البيت ومرة واحدة وأنا بطل من الشباك شُفت طيارة مولعة ونازلة على الأرض فرقعت بالصوت العالي فأبويا وأخواني كلهم طلعلوا يجروا لأنهم افتكروا إن الطيارة هتقع على بيت خالهم ( بيت الحج أبو العينين ) والمسافة بين بيت والدتي وجدي عرفه والد أمي رحمه الله وبين بيت جدي الآخر وهو خال أمي كيلو تقريباً ...... ( للعلم بلد أمي اسمها عزبة عرفه وهي على اسم جدي رحمه الله وبلد جدي الآخر تدعى حوين ولمن لا يعلم حوين فهي بلد الشيخ أبي إسحاق الحويني واسمه الحقيقي : حجازي محمد شريف ) ، المهم : فطلعوا يجروا على حوين والطيارة طبعاً نازله بسرعة رهيبة ومولعة ، والحمد لله أن الطيار تفادى البيت وذهب بالطائرة لأرض زراعية فارغة تماماً ونزل هو بالبارشوت في المصرف " 

 المهم ... أن والدى من نفس البلد ( حوين ) وأعمامي وأهل البلد كلها خرجوا  على المصرف لأجل أن يروا هذا الطيار وكانوا يظنونه إسرائيلي فمسكوه وهاتك يا ضرب . وأتى المنقذ : عم من أعمامي واسمه : أحمد الشوادفي شريف وأخرجه من المصرف  وأول ما شم الطيار نفسه قال له : أنا مصري فحمله عمي على دراجته البخارية  
أما الطائرة فقد وقعت في أرض زراعية وكانت مشتعلة وتتناثر وتقذف شظايا منها فأتت إحداها على طفل فمات .
وقد كُرم هذا الطيار من الرئيس السادات لأنه تفادى الناس وسقط بالطائرة خارج البلد
أما باقي القصة وتفاصيها ربما تسنح لي فرصة لمعرفتها بدقة في أقرب فرصة أزور القرية فيها.

هناك 9 تعليقات:

  1. اولا بشكراك يا احمد على اتاحتة الفرصة لي للرد على هذا الموضوع القيم والتاريخي ويظهر مدى التضحية والنبل الانساني للطيار المصري والمهارة والحمد لله انة وفق في توجية الطائرة بعيد عن الاماكن السكانية
    تحياتي لكي صديقي العزيز اخوك أحمد رسلان

    ردحذف
  2. أحمد لا شكر على واجب ده أمانة فى نقل تاريخ الوطن للأجيال اللى لم تشاهد النقاط الساطعة من تاريخ وطنا العظيم
    سأستمر فى عرض نقاط ساطعة فى تاريخنا الوطنى المعاصر
    وأشكرك ياأحمد وأتمنى أن تستمر وتواصل المسير هنا فى تلك الصفحات فأنت مثال للشباب الطموح الخلاق الذى قابلته
    بارك الله فيك ياأحمد

    ردحذف
  3. انا برده سمعت عن الحكايه دى من والدى بس هل هيه نفس الطائره الله اعلم لان والدى قالى نفس الحكايه انه شاف طائره مولعه فى الجو بس كان ماشى وراها طائره تانيه متابعاها بس اعتقد ان اللى كان بيحكى عنها كانت طائره اسرائيليه وقعت فى الاراضى الزراعيه برده

    ردحذف
  4. والله يااحمد الموضوع محتاج معلومات دقيقة
    حاول تسأل والدتك كده عن الموضوع ده علشان نحصل على معلومة دقيقة وأنا هسأل برده

    ردحذف
  5. واد يا أحمد

    أنا تهت في شجرة العيلة

    بص بقى

    بعيداً عن اللخبطة و الكام فرع اللي كانوا هيفقعوا بوءبوء عيني

    القصة دي جميلة جداً و بتأكدي أن عندنا جنود لو عايزين ياكلوا العالم هياكلوه

    و أن الفرق بينا و بين العالم كله مش تفوق تكنولوجي في علوم السلاح ليهم علينا

    لكن تفوق العقل و الإرادة و العزيمة اللي بتميز الجندي المصري عن أي جندي في الكون

    فعلاً خير أجناد الأرض

    ردحذف
  6. ههههههههه
    صاصا معلش أصلها تتوه برده

    =========

    والله فعلاً يامصطفى كلامك مضبوط مصر عامرة وفيها الخير وهتفضل مليانه خير ما هو ربنا اللى قال كده يامصطفى
    مش برده ربنا قال فاى كتابه الكريم
    ادخلوها آمنين
    وهى الوحيدة اللى ذكرها باسمها فى القرآن الكريم
    وكمان رسولنا الكريم هو اللى مدح أهل مصر وقال انهم خير أجناد الأرض
    يبقى لازم يكون رجالة مصر شجعان وأبطال
    لكن تعرف يامصطفى نفسى نتكاتف ونحشد طاقتنا فى وقت السلم لتنمية الوطن زى ما بنحشده فى وقت الحرب والمعارك
    محتاجين نعمل حمله لحشد طاقاتنا وتغيير الكثير من ثقافاتنا زى ثقافة استغلال الموارد والاختلاف والمشاركة المجتمعية والنظام ... محتاجين نحشد الطاقات لتغيير الكثير من المفاهيم يامصطفى

    أنا ناوى أعمل حملة وعاوز أساعد والغير يساعد

    ورينى نفسك علطول يامصطفى وافتقدك فى المعسكر ياواد

    ردحذف
  7. صحيح يامصطفى ايه رأيك فى مكتبة الأغانى الوطنية اطلب أى أغنية وأنا أحطهالك للعلم أغنية الحزب اللى انت كنت عاوزها عندى اطلبها منى وانا اديهالك ..... هههه
    بجد عندى

    ردحذف
  8. سيبك من الأغاني يا واد يا أحمد

    أنت عارف أنا عايز الكليب مش الأغنية

    المهم

    تعالى خد التاج من البلوج عندي

    فيه مراسم تتويج منتظراك

    http://darsh-dawsha.blogspot.com/2008/05/blog-post_12.html

    ردحذف
  9. منك لله ياصاصا ده كله يابنى جارى الاعداد للتاج ياصاصا

    ردحذف

(مَا يَلْفِظُ مِن قَوْلٍ إِلاَّ لَدَيْهِ رَقِيبٌ عَتِيد)

ملحوظة: يمكن لأعضاء المدونة فقط إرسال تعليق.